Plantun de Prouvènço

Pèr coumpara dos planto d'encò nostre

Equisetum palustre & Plumbago europaea

Counsòudo(-de-palun)

Equisetum palustre

Equisetaceae

Àutri noum : Cassòudo, Coussòudo.

Nom en français : Prêle des marais.

Descripcioun :
La counsòudo-de-palun trachis dins la palunaio. Ei proche de Equisetum arvense mai se n'en destrìo majamen emé si ramo que lou premié article èi mai courtet que la guèino de la tijo (fotò). Es uno planto mens coumuno qu'à passa tèms.

Usanço :
La counsòudo-de-palun es empouisounanto pèr li chivau e li biòu. D'efèt caup d'alcalouïde e de tiaminaso qu'èi marrido pèr la vitamino B1 (tiamino). Pèr acò èi pas emplegado pèr l'ome.

Port : Aubret
Taio : 15 à 50 cm
Fueio : ges
Tipe bioulougico : Geoufite
Cicle bioulougico : Planto renadivo

Gènre : Equisetum
Famiho : Equisetaceae

Ordre : Equisetales

Coulour de la flour : Ges de flour
Petalo : ges
Ø (o loungour) flour : Pancaro entresigna
Flourido : Printèms

Sòu : Ca
Autour basso e auto : 0 à 2400 m
Aparado : Noun

Liò : Palun - Prado umido - Ribiero
Estànci : Coulinen à Termoumediterran
Couroulougi : Pancaro entresigna
Ref. sc. : Equisetum palustre L., 1753

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.